gundam docks at hong kong ii

男人愛高達，女生真係唔明白？唔係喎，時代廣場舉行嘅「Gundam Docks at Hong Kong II」開幕禮，身為嘉賓嘅周秀娜及蔡思貝都好投入，對高達好有興趣喎；就算唔明唔緊要，點到佢明就得啦，場內除咗有夠晒霸氣、全球最大嘅1:3獨角獸高達（Unicorn Gundam）及零式飛翼高達（Wing Gundam Zero EW）吸引男生之餘，仲有2m高嘅Beargguy賣萌討好女生，一於帶埋老婆女友入場，等佢見識吓高達都有卡娃兒嘅一面。

兩年前嘅夏天，時代廣場舉行咗第一次嘅「Gundam Docks at Hong Kong」展覽，全球首台1:3嘅RX-78-2元祖高達及MS-06S「紅彗星」馬沙專用渣古壓場，成為繼日本台場嘅另一個高達迷朝聖地，威水到日本都大字標題報道，事後大家當然想Take Two，今日願望成真了，新主角係企喺露天廣場嘅獨角獸高達，以及位於2/F嘅零式飛翼高達；高達型號多不勝數，點解今次選中呢兩部？據主辦當局表示，上次嘅高達及渣古係資深一輩嘅高達迷摯愛，今次希望新知舊雨都吸引得到，於《UC》出場嘅獨角獸高達，就係新舊高達迷都同樣鍾意嘅主角機，至於零式飛翼高達就係新一輩粉絲嘅心頭好。

新變色燈光匯演

「選角」有心思之餘，製作上更加見出誠意。先講獨角獸高達，高約7.5m，花咗成年時間製作，選用NT-D全開嘅毀滅模式（Destory Mode）造型，根據原裝機設，外露嘅精神反應骨架會發出紅光，劇情尾段變成綠光，今次嘅1:3版本跟到足之餘，仲有變色功能，繼紅色、綠色之餘，精神感應骨架仲會變成黃色、紫色等多種顏色，夠創意，而且每晚六點至10點仲會舉行「獨角獸高達燈光匯演」，外牆上嘅HDTV大電視會播出《UC》嘅動畫片段外，仲會有燈光、聲效及放煙增加氣氛。走上2/F，抬頭一望就有高約9.8m嘅零式飛翼高達，居高臨下就似從天而降，雙目及心口嘅感應器都識發光，氣勢十足，高達迷準備好入場參拜未？

Beargguy新Look冧女生

高達絕對唔係男生專利，大頭身細嘅BB戰士已經吸引咗唔少女粉絲，尤其是近年熱播嘅《高達創戰者》及《高達創戰者Try》，當中出場嘅「熊霸」Beargguy，就以熊啤啤嘅造型贏盡女生歡心，今次Gundam Docks展覽亦都有「熊出沒注意」，就喺獨角獸高達對面嘅地面展覽廳，高約2m大大隻，而且換上紅黃雙色，心口多咗個「囍」字，係專為今次活動而設嘅華風造型，女生到場當然要野生捕獲合照一番，不過記住溫柔啲，唔好整花整傷Beargguy呀！